انا شاب شاف كل انواع الغلب اللى ف الدنيا

عمرى ما مسكت جنيه ف ايدى غير لما اشتغلت بعد ما خلصت امتحانات اخر سنه ف الاعداديه عمرى ما اخدت درس خصوصى الا ف اولى ثانوى لما انا اشتغلت وبقى معايا فلوس دروسى ومصاريفى لانه ما كانش ينفع احمل والدى اعباء اضافيه عليه الحمد لله استمر الحال كده لحد ما خلصت جامعه بعد اخر يوم ف الامتحانات اسافر ع الشغل على طول وبعد ما خلصت دراسه واخدت تاجيل من الجيش استمريت ف الشغل ده مع انه المفروض انه مايليقش بانسان عادى مش خريج جامعه بس الحمد لله عملت منه كتير بنيت بيتى لوحدى واتجوزت بعد اربع سنين من انهاء الدراسه من غير مساعده من اى حد ولو بجنيه شطبت شقتى احلى تشطيب وفرشتها وجبت شبكه ب 35 الف جنيه وكل لوازم الفرح اللى عارفينها ومراتى كانت عارفه طبيعه شغلى من الاول وعارفه انى هسافر الشغل وانزل اجازات كل شهر او اقل بعد الجواز بقى هما يدوب شهرين ولاقيتها عاملالى مشكله بسبب الشغل وعايزانى اتوظف او اشوف اى شغل عندى ف البلد هى عندها حق لانها خايفه عليا وعايزانى ارتاح من الشغلانه دى وانا حاولت اشوف شغل بس زى م انتوا عارفين مفيش حد بيشتغل بمؤهله وانا لو من الاول استنيت لما اشوف وظيفه والا كنت عملت اى حاجه والا كنت اتجوزت لحد دلوقتى بحاول اصبرها واقولها ادينى شغال اهو لحد ما ربنا يكرمنى بوظيفه او اى حاجه وقدمت ف مسابقه ال30 الف معلم بس للاسف مش معايا دبلومه المشكله بقى انها كل يوم تقريبا بتعمل معايا مشكله علشان اسيب الشغل اللى انا فيه ومش عارف اصبرها بجد وخصوصا لانى لما بسافر ما قدمهاش الا انها تقعد لوحدها ف البيت اما تقعد عند اهلها وف الحالتين انا نفسيا مش مرتاح ومش عارف اعملها ايه او اصبرها ازاى ياريت لو حضراتكم تفيدونى اعمل معاها ايه ومعلش مش عايز اى حد يلومها لان ربنا يخليهالى هى كل حاجه ليا وانا نفسى اريحها بجد ...واسف للاطاله وجزاكم الله خير