الحب من اول نظره

انا من الناس المؤمنين اوى من الحب من اول نظرة و ده اللى حصل معايا بمجرد دخولى الكلية حبيت بنت من غير حتى ما اعرف اسمها بمجرد ما شفتها فى السكشن حاولت كتير اقرب منها او اتعرف عليها لكن فشلت مكنتش بقدر اتكلم قدامها مع انى مع اى بنت غيرها كان الموضوع بالنسبة لى عادى فضلنا اول سنتين على الحال ده نظرات من بعيد لبعيد كنت فى اوقات كتير بتخيل ان هى بتبادلنى نفس الشعور او جايز عشان كنت بحبها اوى.. مش عارف ...المهم فى تالت سنة ليا فى الكلية قدرت اتعرف عليها و اعجابى و حبى ليها زاد اكتر لما عرفتها و عدت السنة التالتة و قررت فى السنة الرابعة انى اعترفلها بمشاعرى طبعا قبل ما اروح و اقلها حاولت كتير معملش كدة كان جوايا صراع نفسى رهيب لكن فى النهاية خدت قرار انى هروح و اصارحها بمشاعرى و اللى يحصل يحصل بصراحة كنت عايز اخلص و اعرف حقيقة مشاعرها ناحيتى لانى مكنتش قادر احكم عليها و لا على مشاعرها ناحيتى و فى نفس الوقت كنت بفكر فيها كتير جدا لدرجة انى مكنتش قادر اركز فى مذاكرتى و كنت على وشك السقوط و الكلام ده كان فى الترم الاول المهم قلتلها و كان ردها مؤدب جدا و كان بالرفض . محاولتش اعرف هى رفضتنى ليه و اتفقنا ان الموضوع ده مياثرش على علاقتنا و نفضل اصحاب بس انا مقدرتش حاولت كتير انى اتعامل عادى و لا كان حاجة حصلت بس معرفتش كنت بين نارين مش قادر ابعد عنها و فى نفس الوقت مش قادر اكون معاها زى الاول و طبعا مش قادر اركز فى اى حاجة و خصوصا فى دراستى عدا الترم الاول و فى الاجازة خدت قرار انا بعتبره كان صح لان بصراحة مكنش عندى بديل و لانى عارف نفسى كويس و كنت عايز انجح و اتخرج و كان القرار هو انى الترم التانى كله مبكلمهاش و بهرب من اى مكان ممكن يجمعنا سوا مركز جدا فى دراستى و مش بحاول ادى لنفسى اى فرصة او حيز انى افكر فيها و عدا الترم التانى من غير ما اكلمها او اقلها انا ليه عملت كدة و نجحت و اتخرجت بتقدير كمان و سافرت و نسيت الموضوع لانى مكنش عندى وقت خالص و كنت مركز فى شغلى اوى و مكنتش بفكر فى الارتباط نهائيا بعد الموضوع ده و بدات الحاجة تدورلى على عروسة و المشكلة انى مش مقتنع بجواز الصالونات و لا كان حلمى اتجوز بالطريقة دى و من كام يوم لقيت البنت اللى كنت بحبها على الفيسبوك بالصدفة لما شفتها اتاثرت جدا و رجعلى الحنين ليها تانى فكرت اكلمها او اضيفها عندى بس كنت بتردد فى كل مرة افكر اعمل كدة خصوصا انى حاسس انها مش هتنسى الفترة اللى كنت مبكلمهاش فيها و اد ايه انا كنت قليل الذوق معاها ..تفتكروا اخد الخطوة دى و اكلمها و لا بلاش و انساها خصوصا انى دايما بقول لنفسى ايه اللى اتغير يعنى يخليها توافق دلوقتى على الارتباط بيا و هى رفضتنى زمان .